מָרְטִין אֲלְפִיֶּה - פָּרָשַׁת חַיֵּי שָׂרָה

פָּרָשַׁת חַיֵּי שָׂרָה

קְרִיאַת מִנְחָה

עֲלִיָּה רִאשׁוֹנָה

סֵפֶר בְּרֵאשִׁית פֶּרֶק כ"ג

(א) - וַיִּהְיוּ֙ חַיֵּ֣י שָׂרָ֔ה מֵאָ֥ה שָׁנָ֛ה וְעֶשְׂרִ֥ים שָׁנָ֖ה וְשֶׁ֣בַע שָׁנִ֑ים שְׁנֵ֖י חַיֵּ֥י שָׂרָֽה: (ב) - וַתָּ֣מָת שָׂרָ֗ה בְּקִרְיַ֥ת אַרְבַּ֛ע הִ֥וא חֶבְר֖וֹן בְּאֶ֣רֶץ כְּנָ֑עַן וַיָּבֹא֙ אַבְרָהָ֔ם לִסְפֹּ֥ד לְשָׂרָ֖ה וְלִבְכֹּתָֽהּ: (ג) - וַיָּ֙קָם֙ אַבְרָהָ֔ם מֵעַ֖ל פְּנֵ֣י מֵת֑וֹ וַיְדַבֵּ֥ר אֶל-בְּנֵי-חֵ֖ת לֵאמֹֽר: (ד) - גֵּר-וְתוֹשָׁ֥ב אָנֹכִ֖י עִמָּכֶ֑ם תְּנ֨וּ לִ֤י אֲחֻזַּת-קֶ֙בֶר֙ עִמָּכֶ֔ם וְאֶקְבְּרָ֥ה מֵתִ֖י מִלְּפָנָֽי: (ה) - וַיַּעֲנ֧וּ בְנֵי-חֵ֛ת אֶת-אַבְרָהָ֖ם לֵאמֹ֥ר לֽוֹ: (ו) - שְׁמָעֵ֣נוּ | אֲדֹנִ֗י נְשִׂ֨יא אֱלֹהִ֤ים אַתָּה֙ בְּתוֹכֵ֔נוּ בְּמִבְחַ֣ר קְבָרֵ֔ינוּ קְבֹ֖ר אֶת-מֵתֶ֑ךָ אִ֣ישׁ מִמֶּ֔נּוּ אֶת-קִבְר֛וֹ לֹֽא-יִכְלֶ֥ה מִמְּךָ֖ מִקְּבֹ֥ר מֵתֶֽךָ: (ז) - וַיָּ֧קָם אַבְרָהָ֛ם וַיִּשְׁתַּ֥חוּ לְעַם-הָאָ֖רֶץ לִבְנֵי-חֵֽת:

עֲלִיָּה שְׁנִיָּה

(ח) - וַיְדַבֵּ֥ר אִתָּ֖ם לֵאמֹ֑ר אִם-יֵ֣שׁ אֶֽת-נַפְשְׁכֶ֗ם לִקְבֹּ֤ר אֶת-מֵתִי֙ מִלְּפָנַ֔י שְׁמָע֕וּנִי וּפִגְעוּ-לִ֖י בְּעֶפְר֥וֹן בֶּן-צֹֽחַר: (ט) - וְיִתֶּן-לִ֗י אֶת-מְעָרַ֤ת הַמַּכְפֵּלָה֙ אֲשֶׁר-ל֔וֹ אֲשֶׁ֖ר בִּקְצֵ֣ה שָׂדֵ֑הוּ בְּכֶ֨סֶף מָלֵ֜א יִתְּנֶ֥נָּה לִ֛י בְּתוֹכְכֶ֖ם לַאֲחֻזַּת-קָֽבֶר: (י) - וְעֶפְר֥וֹן יֹשֵׁ֖ב בְּת֣וֹךְ בְּנֵי-חֵ֑ת וַיַּעַן֩ עֶפְר֨וֹן הַחִתִּ֤י אֶת-אַבְרָהָם֙ בְּאָזְנֵ֣י בְנֵי-חֵ֔ת לְכֹ֛ל בָּאֵ֥י שַֽׁעַר-עִיר֖וֹ לֵאמֹֽר: (יא) - לֹֽא-אֲדֹנִ֣י שְׁמָעֵ֔נִי הַשָּׂדֶה֙ נָתַ֣תִּי לָ֔ךְ וְהַמְּעָרָ֥ה אֲשֶׁר-בּ֖וֹ לְךָ֣ נְתַתִּ֑יהָ לְעֵינֵ֧י בְנֵי-עַמִּ֛י נְתַתִּ֥יהָ לָּ֖ךְ קְבֹ֥ר מֵתֶֽךָ: (יב) - וַיִּשְׁתַּ֙חוּ֙ אַבְרָהָ֔ם לִפְנֵ֖י עַ֥ם הָאָֽרֶץ:

עֲלִיָּה שְׁלִישִׁית

(יג) - וַיְדַבֵּ֨ר אֶל-עֶפְר֜וֹן בְּאָזְנֵ֤י עַם-הָאָ֙רֶץ֙ לֵאמֹ֔ר אַ֛ךְ אִם-אַתָּ֥ה ל֖וּ שְׁמָעֵ֑נִי נָתַ֜תִּי כֶּ֤סֶף הַשָּׂדֶה֙ קַ֣ח מִמֶּ֔נִּי וְאֶקְבְּרָ֥ה אֶת-מֵתִ֖י שָֽׁמָּה: (יד) - וַיַּ֧עַן עֶפְר֛וֹן אֶת-אַבְרָהָ֖ם לֵאמֹ֥ר לֽוֹ: (טו) - אֲדֹנִ֣י שְׁמָעֵ֔נִי אֶרֶץ֩ אַרְבַּ֨ע מֵאֹ֧ת שֶֽׁקֶל-כֶּ֛סֶף בֵּינִ֥י וּבֵֽינְךָ֖ מַה-הִ֑וא וְאֶת-מֵתְךָ֖ קְבֹֽר: (טז) - וַיִּשְׁמַ֣ע אַבְרָהָם֮ אֶל-עֶפְרוֹן֒ וַיִּשְׁקֹ֤ל אַבְרָהָם֙ לְעֶפְרֹ֔ן אֶת-הַכֶּ֕סֶף אֲשֶׁ֥ר דִּבֶּ֖ר בְּאָזְנֵ֣י בְנֵי-חֵ֑ת אַרְבַּ֤ע מֵאוֹת֙ שֶׁ֣קֶל כֶּ֔סֶף עֹבֵ֖ר לַסֹּחֵֽר:

חֲזָרָה לְעַמּוּד הָרָאשִׁי "פָּרָשׁוֹת הַתּוֹרָה – קְרִיאוֹת מִנְחָה"